聖誕長假期返嚟，股市成交依然了無起色，只有二百幾億元，從業員見無力收復股市失地，倒不如儲足能量，準備明年再作戰。出年證券業界首場「大龍鳳」，睇怕都要數一月十六日喺港交所（00388）展覽廳舉行嘅金融服務界選委同特首候選人嘅「世紀會面」。
證券學會會長李細燕話，當日已訂咗港交所展覽廳做場地，其中一名特首候選人已答應下午五點同佢哋見面，其他仍喺度確認時間。幾名特首候選人屆時應該唔會同場，而係分開喺唔同時段，同班選委見面，聽佢哋表達意見。
18名選委主要來自七個證券組織，同埋金銀貿易場，但為咗團結一致，經紀為此已達成兩大共識，就係港股食飯要有個半鐘，同埋恢復最低佣金，即係推出佣金二級制。
港交所董事會今個月企硬如期執行明年三月嘅次階段港股加時，但經紀團體依然唔放棄，繼續堅持爭取食飯個半鐘，但午休時間點樣分配，就接受港交所一切安排。換句話講，佢哋不會再執着於係十一點半食到一點，定係一點食到兩點半，總之食個半鐘，就心滿意足喇！
第二就係反擊近期有不少證券行割喉減佣。講來講去，兩樣嘢都影響到經紀嘅飯碗 ，未來特首唔知點睇呢？但絲絲聽聞，港交所一月份冇董事會開喎，得番二月份呢個檔期機會，要成功扭轉局面，都幾牙煙喎！