市場熱線：華潤燃氣購併壯大

部分奶品股逆市升

花旗國消費信心指數創8個月新高，睇電視見美國人暴力搶購遊戲機同波鞋，打工仔亦有望延長稅務優惠多一年，但大型百貨公司SEARS要關舖兼盈警。其實花旗國經濟數據雖然幾靚仔，但公司成績表呢排好幾間都唔合格，就快又到放榜期，淨睇第4季歐元匯價跌得咁慘，而標普500公司超過一半靠美國以外地區，所以對放榜期不能期望過高。

蒙牛（02319）單嘢已預告會累街坊，尋日一開波已跌穿20蚊，跟住有買盤趁低吸納，低位反彈一成，但成副派貨格，跌番到20蚊收市，成交達15億元。有人覺得蒙牛唔算好大鑊，因為毒奶未有流出街，可能隔三幾個月之後又淡忘；但蒙牛今年已跑贏大市，尋日大跌後亦不過重返一年前低位，預測PE仍高達17.6倍。其他同奶有關嘅公司未有陪跌，旺旺（00151）、大慶（01007）同澳優（01717）仲見上升，但供奶嘅現代牧業（01117）同姐妺公司中糧（00606）就被株連。

其他跌得傷嘅仲有鐵路股，出年鐵路投資減少，搞到「兩車」（01766及03898）同埋「兩鐵」（00390以及01186）出軌。以前鐵路有乜負面新聞，飛機股就幸災樂禍，但飛機同鐵路股呢排攬住一齊死，因為近月嘅飛機載客量只係得低增長，除咗經濟轉差之外，亦話高鐵嘅威脅開始浮現。奶可以唔飲，但飛機火車唔可以唔搭，高鐵拗手瓜唔輸得畀飛機，而飛機則受高油價同碳稅影響，出年環境相信會較差。

內地實施天然氣價格改革，以廣東同廣西做試點，天然氣價同LNG等可再生能源市場價格掛鈎，其實即係拉近國產價同進口價嘅差距。花旗證券話上游股最受惠，下游分銷商嘅影響則係中性，因為上游天然氣開發商會直接加價，而下游燃氣股則會將成本轉嫁至客戶身上。

通脹回落獲准加價

尋日中石油（00857）股價升2%，中海油（00883）冇升跌。燃氣股則個別發展，以北控（00392）升2.2%最好，而啱啱有新發展嘅華潤燃氣（01193）亦升近1%。其實燃氣股嘅風險係最大，舊年年中天然氣大幅加價25%，但下游分銷商遲遲未獲准加價，不過隨住通脹回落，燃氣商已陸續調整收費，潤燃旗下嘅鄭州華潤燃氣（03928）最近獲准加價18至33%。

潤燃本身亦一路做大，剛宣布投資40億人仔成立一間寧波合營公司賣氣，之前又吞埋天津天聯公用（01265）。「高佬盛」認為潤燃嘅策略會令公司快高長大，所以維持公司「確信買入」評級，目標價13.7元。潤燃呢年幾股價大部分時間都喺10至12蚊之間上落，以一間不斷壯大嘅公司來講，有耐心遲早有回報。