市場熱線：農行醞釀破悶局

其實香港人嘅購買力仍然大把，淨係睇聖誕期間嘅零售、食肆同外遊消費仲係超級旺盛，完全唔似出年會大難臨頭。如果短線博新年財嘅話，仍係諗吓啲零售股，博短線數據理想有沖喜作用，而且估值已回落至合理水平。漢登（00448）以前只係值4、5倍PE兼冇人吼嘅股仔，但今次「嫁入豪門」證明賣下價衫一樣有錢途。

零售股短線值博

香江放假期間，外圍照常開市，亞太股市靜英英，A股仍係爛泥扶唔上壁，滬綜指再創今年收市新低；但人仔發力周一再創新高，周二略為回軟，阿爺擺明想用人仔升值去對抗走資。意粉國今日同聽日都會拍賣國債，年尾有冇機會標尾會亦要睇住賣債結果，上個禮拜歐央行用1厘低息借咗5萬億畀錢莊，用意都係等錢莊買債賺息差，之前鬥牛國賣債亦反應熱烈兼債息大跌，膽粗粗可以博標尾會兼粉飾窗櫥。

聖誕期間零售熱、樓市旺一手唔旺二手，祖國樓市亦都冷清清，中山想出年取消限價令，暫時冇聽到阿爺叫停。上次佛山取消限購即刻被阿爺喝止，皆因限購同限價係兩回事。內房股呢排無懼樓市寒風，皆因樓市唔掂嘅話，最大鑊嘅係地方政府，所以阿爺會「適可而止」，但有規模較細嘅內房股已開始要變賣家當，要買都要買龍頭股。

蒙牛（02319）自己發現有毒奶兩個月都唔出聲，今日股價肯定遭殃，事件已連累到食品類A股呢兩日下跌，本地上市嘅奶股今日亦唔慌有運行。三聚氰胺事件過咗三年，國產奶今年以為有好日子過，但連大股東換咗中糧集團嘅蒙牛都出事，證明「名牌」亦信唔過。

人行並未如傳言般喺聖誕期間減RRR，其實減RRR同聖誕有乜關係？祖國冇聖誕假期，以前加RRR就話揀長假公布等大家有時間消化，好消息又使乜擇日子？總之，減RRR係一個大方向，農曆新年前應該有機會減一次。

農曆新年前料減RRR

古勝喺假期前已推介過工行（01398），今日想再講吓隻農行（01288）。農行截至九月底貸存比率係56.6%，不良貸款比率係1.6%，前者屬於偏低，後者屬於偏高，都有改善空間；而農行最大賣點係農村業務比重最大，國策向農村傾斜，農民收入增加，農行自然得益，存款基礎亦較為強勁，所以喺4大國有錢莊當中，反而有少少溢價。

除咗預期會逐步減RRR之外，祖國亦傳聞會延遲實施錢莊新資本需求，目的都係為咗鬆綁，4大行喺十二月中旬新增貸款突然急升已係一個訊號。走勢方面，4大行都已升逾10、20、50及100日平均線，並突破三角形走勢。內銀股勝在估值低，大行亦得7倍PE、兩倍PB，想搵隻較長線升值概念股就可考慮吓農行。

古勝