接近一年終結，今年多咗好多工作，業務忙個不停；一年嘅埋尾，大家當然要總結一下全年嘅得失，令自己每進益新。呢一年，市場亦多咗好多變化，如果唔充分裝備自己，只會被淘汰。總而言之，大家常注意風險，先求知再投資，自然能度過風風雨雨。
近日新股亦待年尾爭相上市，當中新華保險（01336）算係有點睇頭，喺保險界中力爭上游。新華保險集中內地壽險業務，期望喺呢幾年佔據市場領先地位。
公司自二○○四年以嚟，喺全國壽險界都係頭五位，市佔率由○八年嘅7.6%，升到一○年嘅8.9%。雖然增長唔係好標青，算係交到功課。公司一○年中國原保險保費收入當中，喺北京、上海、廣東等大城市，市場份額都係頭四名。
新華保險勝在靈活多變，雖然冇其他大型保險公司分銷網絡咁多，但公司嘅分銷機構勝在效能高，每份成本都能創造出更高嘅利潤。截至今年六月底止，新華保險有超過20.4萬成員，更喺全國分布有2.5萬個以上嘅銀行保險分銷部，當中有1.5萬人係銀行保險專管員，故專業水平毋庸置疑。
集團勝在細細粒，市場仍有好大發展空間。當中匯金持股31%，上年度每股盈利2.2元人民幣，現價24.15元，市盈率約11倍。繼續追蹤，出發！
香港大學電子金融服務榮譽助理教授徐燦傑