貴為全港最大嘅銀行，獅子行滙豐擁有超過四百二十萬名零售銀行客戶，服務渠道包括分行、流動理財、網上銀行、自動櫃員機等……分行以外嘅其他服務網絡渠道，之前由香港區個人理財直接服務網路主管趙慕賢（Ada）負責打點一切。不過，呢位後生又靚女嘅賓架又靜悄悄地離開咗喇。
佢今年都較少公開露面，絲絲比較有印象係，一○年時獅子行計劃推出「升級版」保安編碼器，當時Ada仲親身示範點用法，香港區更加係成個集團第一個用新編碼器嘅地區添。
Ada最後一次以「香港區個人理財直接服務網路主管」身份曝光就係十月，當時獅子行出新聞稿話延長網上及流動理財的高息投資存款交易時段。
十一月相信係獅子行最風聲鶴唳嘅月份，亞太區企業可持續發展總裁區佩兒無聲無息走咗，如今Ada亦消失埋，希望不安嘅氣氛盡快散去。