黃偉康（Andrew）自己開靈獅控股做老闆，竟然拉埋著名玄學家楊天命入股，兼做執董，當時都嚇咗絲絲一跳，依家就陸續見到佢哋嘅「協同效益」啦！
龍年就到，相信好多投資者都好想知出年環球金融同港股走勢，咁啱絲絲同靈獅控股主席兼行政總裁Andrew歎茶吹水，佢就推介咗楊天命嘅新作《2012年龍年八字批命運程》畀絲絲。一打開本書，發現內有乾坤，入面附送咗一隻由楊天命同Andrew一齊講股論市嘅光碟。唔知Andrew係想幫老友推書，定係推銷自己呢？
Andrew同楊天命除咗係生意「拍乸」外，仲好鬼老友。Andrew係咁講本書：「佢本書真係寫得好好睇，而且預測又好準嘛！」今次Andrew上鏡幫老友講股，唔知佢係咪收番個友情價呢？佢即刻澄清：「你都識得講係老友喇，又點會收錢呢，總之今次幫佢忙，真係幫得好開心，大家之間好少講錢嘅！」