市場熱線：工行最壞時刻已過

出年首季亦係大部分專家睇淡，但人人睇淡就可能出現相反理論，而又唔悲觀得晒，始終有人憧憬歐洲最終會不堪壓力印銀紙，美國大選年嘅公開武器係QE3，美股今年冇跌過，歐洲股市尋日開波又爆上，但呢排未到收市都有好大變化。呢排消息好壞難分，歐洲央行開倉派錢，1厘低息真係唔借就笨，學鄭家華話齋借低息稅貸再放高息定期賺息差都抵，但孖屐又驚歐洲錢莊唔用筆錢來買債，呢類「走後門QE」只係自欺欺人。

尋日窩輪成交多過牛熊，喺愈細波幅嘅市愈常見，但期指成交有7.2萬張唔算少，為3個交易日後結算做轉倉。滬綜指尋日低見2,149點，收市反彈到2,186點只係微跌，有人形容A股係無底黑洞。

認購新股當買大細

國土部又話出新例打擊囤地，兩年唔開工就將幅地充公，睇落好似幾嚴厲，但阿爺話打擊囤地已講過N次，舊年講到有份「黑名單」，最後亦不了了之，最緊要係上有政策下有對策，如果地方政府將幅地豁免做「特別規劃」就可以奉旨空置，而地方政府又一向倚重賣地收入，實際係地主佬綁架地方政府。內房股尋日亦不跌反升，睇死阿爺口硬心軟，情形同○八、○九年一樣，金融海嘯反而救番樓市。

中織材（03778）擺明夕陽工業竟然以近招股價上限上市，果然有料到，連帶隻京能（00579）亦冇穿底。今日登場嘅天瑞水泥（01252）又刷新咗紀錄，得67萬股公開認購，連1球都唔夠，好多股民只係當賭大細。

十二月頭半個月四大錢莊新增貸款750億人仔，都算幾令人意外，因為頭10日得300億人仔，跟住5日突然急增，有分析話係財政存款回流，抵銷之前歐美班資回朝造成嘅存款流失。

地方債壓力漸紓緩

幾隻錢莊股同係出現大三角形走勢，好快有突破。之前唔少人睇死錢莊股到年底係高危，因地方債務到期隨時爆煲，但到家陣不良貸款不升反跌，阿爺亦用柔功拆彈，部分地方政府發債成本仲低過中央，加埋出年阿爺會鬆水掣，內銀股今年咁難捱都捱過，出年RRR會減幾多次視乎環境，但可博因素明年顯高過今年。

歐美錢莊今年通街股價跌超過一半，內銀低PE、高息率、低PB唔係絕對優勢，但四大錢莊勝在有阿爺照，祖國則有3.2萬億美金「維穩」，唔似歐美政府窮到燶。四大內銀當中，中行（03988）貸存比率觸及紅線，農行（01288）更係資本充足率不足，建行（00939）一向最多散戶玩，但股價亦最不濟。工行（01398）截至九月底嘅貸存比率得62.6%，一旦中央放水，該行嘅貸款增長速度亦會最快，所以古勝較鍾意呢隻。

古勝