瑞典紳寶汽車一直都係絲絲鍾意嘅車款之一，終於響大股東美國通用拒絕賣盤之下，正式遞交破產申請，即係話內地民企龐大集團同青年汽車組財團，諗住執平貨嘅算盤打唔響，依家可能自己都要做埋債權人，不過青年汽車方面就強調仲有番啲「渣拿」。
原來龐大同青年汽車加加埋埋已經畀咗紳寶差唔多成10億人仔嘅救命錢，但最終因為通用擔心將技術畀咗大陸而令到交易告吹。不過，青年汽車方面就話，過去投入嘅錢，部分已經買到紳寶全新開發嘅鳳凰平臺技術（Phoenix），而且資料仲已經拎咗返大陸，又話技術物超所值，打算自行開發91至97車型。
可惜據講93、95、94x等車型專利權，同原有鳳凰技術平臺，其實仍然掌握喺通用手上，其他車型就未成熟，業界話若要自行研發，分分鐘要揼水成10億美金！本來青年汽車諗住上述車型開發完成，毋須再用通用技術時，可以佔七成股份，但響紳寶進入破產程序後，就變得唔明朗。
鳳凰平臺技術係紳寶今年日內瓦車展亮相嘅概念車款，動力系統由1.6升200hp渦輪增壓汽油引擎驅動前軸，後軸由32hp摩達驅動，加速到100公里只要5.9秒。