恒大（03333）加入咗香港嘅金魚缸都有幾年喇，公司發展真係好快，站穩陣腳後，係時候度計「發圍」，絲絲好奇問佢哋執行董事兼副總裁賴立新有乜想法，佢話新一年希望能「入圍」──進身藍籌成分股。
「染藍」要睇好多條件o架，賴立新講，今年雖然受到內地調控影響，呢兩個月賣樓少咗，不過今年到十一月都做咗成790億人仔，直逼一哥中國海外（00688），成績都算唔錯啦，未來梗係會繼續積極拓展業務。
公司想「染藍」，打工仔就當然係想加人工啦，賴總話畀絲絲聽，原來恒大每年都係十月加人工，每年加幅平均都有10%。哇！如果香港嘅打工仔都有咁嘅加幅，就唔怕通脹呢個大敵啦！10%只係平均數，好表現嘅員工，加幅仲會「翻一番」添，唔怪得佢哋員工都咁落力為恒大賣樓啦！
恒大老闆許家印，尋日唔得閒出嚟同絲絲飲茶，但都好有心託賴立新帶佢本新書畀絲絲。呢本叫《恒大傳奇》嘅書，係講述許家印嘅發展經過，恒大三萬員工人人有份，而恒大仲另外發行咗5萬本，盛惠35蚊人仔，聽講仲賣得唔錯添！