市場熱線：超威有條件翻兜

趁淡市收購執平貨

隔晚唯一壞消息係聯儲局擬接受《巴塞爾資本協定III》，花旗國錢莊股可能要撲水，股神揸住嘅美銀勁坐艇，原本諗住「聖誕鐘，掟滙豐」，但大笨象（00005）死唔去，反而祖國移動（00941）自從上周五無故大跌之後仍然捱打，72蚊個位不容有失。

呢排好多股有無名腫毒，而且不限於疑似大股東押股嘅細價股，金蝶（00268）食咗瀉藥，唔夠兩個月跌咗4成，呢隻股之前升咗兩年未停過，化完蝶之後又變番一條蟲。中國東集（00581）同利邦（00891）呢類與世無爭嘅股亦被洗倉，後者啱啱同漢登（00448）成為姊妺，市場會唔會擔心佢失寵呢？

呢排購併陸續有來，趁市淡執平貨係定律，利豐（零售）近6成溢價買漢登，帶起埋其他賣衫股，但收市升幅已大幅收窄。古勝講過漢登主力做南韓同台灣市場，有財團買起唔代表亦睇好本地零售，不過漢登既然值十幾倍PE，其他賣衫股身價亦跟住升。

A股同港股一樣升唔起亦跌唔落，尋日先升近1%亦倒跌收場，社保基金理事長戴相龍亦開腔撐地方養老金入市；地方養老金揸住1.8萬億人仔，放喺錢莊收息唔夠應付通脹，所以擺部分落低風險股票係一家便宜兩家着，A股出年隨時來個翻身。古勝覺得最緊要係取得平衡，好似香港外匯基金一味買美債，只係少做少錯嘅官場智慧，睇見人哋新加坡淡馬錫低買高賣建行（00939）賺番一筆，外匯基金真係愚笨同老實。

電動自行車電池股已經好耐冇炒過，兩隻股超威（00951）同天能（00819）已整固咗個幾月，呢輪有輕微作動，係時吼吓佢哋準備炒業績。

生產電池成本下降

兩隻股今年都幾反覆，先係話阿爺原本收緊電動自行車發牌制度，但因反對聲太大而擱置，跟住發生鉛酸電池污染事件，搞到好多企業要停產整頓，但呢次事件反而被視為好消息，因為產品供不應求令價格上漲。總之，跌過又炒過，電池股回歸平靜，可以儲定貨迎接下次升浪。

天能早個零禮拜接受訪問時話，鉛價下半年同其他金屬價格一樣下跌，而鉛佔成本六成幾，成本自然低咗，同時電池售價下半年加咗，所以下半年毛利率會好過上半年。天能同超威係競爭對手，所以相信兩間公司經營環境差唔多，全年業績表都應該唔差，預測PE都係5倍幾。

比較之下，天能較為大隻，喺市佔率亦係一哥，但超威山東嘅新廠已喺第三季投產，每年新增產能900萬個電池，相信會令雙方實力更為接近。古勝今次會揀超威，貪佢貨疏易炒啲。

古勝