近期新股表現曳，無論係千億巨企定係百倍超額認購，幾乎都是無一例外破發收場，更有首日掛牌便急挫四成者，令認購者傷亡慘重。不過睇番舊年年尾掛牌嘅四環醫藥（00460），4.6元上市，首日勁升25%收5.77元，但尋日收2.85元，較高位唔見一半，較招股價低38%，長揸者同樣傷到入骨。
講到醫藥股，都可算是過去一年表現最差板塊之一，致命傷自然係發改委對藥物的降價限價令，不過之前憧憬醫改，藥股炒過龍亦係原因之一。以四環為例，去年每股賺0.154元，相當於招股價市盈率29.8倍，而高位市盈率更達37.4倍，難怪政策一變，股價即時陷入長期跌勢。
不過，經長時間調整後，四環現價市盈率只係18.5倍，已回到合理水平，而且限價令的影響亦已淡化，集團中期純利增長49.4%至3.81億元人民幣，整體產品毛利率更上升5個百分點，全年業績值得樂觀預期。昨日四環逆市勁升4%，博年尾燒冷灶，上望3.2元，支持位2.6元。
詩詩