聖誕節臨近，又係互相送禮嘅日子，通常大公司都會鬥豪，向友好贈送嘅禮物籃唔係法國紅酒，就係名貴朱古力、芝士等。
不過，話說香港房地產信託基金嘅一哥領匯（00823）就嚟個反璞歸真，禮物籃入面嘅嘢全部都係公屋商場可以買到。
絲絲並唔係想貶低領匯，反而覺得咁做好有心思，因為禮物籃入面每樣嘅食物同飲品都附有一段文字介紹，一來宣傳自己旗下嘅商場街市，二來又可以扶助一下本地品牌，可謂一舉兩得。
好似泰國金柚咁，該段介紹文字就話係嚟自大埔大元街市某鮮果中心，除咗講呢間鮮果中心點樣一家三代艱苦經營之外，當然唔會漏咗講大元街市點樣用9,500萬元翻新，同埋攞咗今年嘅企業社會責任獎啦。
另外介紹亦都提到一啲上世紀五、六十年代開業嘅茶莊同埋餅家小故事，雖然時代進步咗，但喺一啲生產或包裝程序仍然保留舊有嘅手作特色。領匯嘅公關就話啦，其實我哋身邊都有好多呢啲老香港嘅故事，只係我哋願唔願意去發掘。咁大家下次行屋邨商場不妨留意下嘞。