歐美國家一向以高福利著稱，但卻種下過分舉債嘅後遺症。據內地官方媒體做嘅一項有趣調查，唔少發達國家嘅福利支出超過國民生產總值（GDP）嘅三成，當中法國公民由出娘胎到死亡可以享受到400幾種福利，而瑞典丈夫有9個月全薪產假，德國人更因生理需要，連買「偉哥」嘅費用都可以向政府報銷。
絲絲一向相信，呢個世界無免費午餐嘅道理，政府向民眾提供免費福利，最終亦由民眾埋單，到最後搞到國家財政入不敷出，富國家變成窮國家。
講開呢啲高福利國家，受惠對象通常覆蓋全人類，好似法國同英國咁，前者不論國籍，只要有合法居留身份就可享受箇中福利，後者連難民都可以得益，而英國社會福利支出就佔GDP約25.9%。
但呢個比例都仲未算高，喺芸芸歐洲國家之中，絲絲最羨慕嘅就係瑞典丈夫，老婆生仔，丈夫便有9個月嘅全薪產假，難怪當地社會福利開支高達38.2%啦！