大大隻嘅新股近排齊齊潛水，只好寄望啲細細粒又有名牌效應嘅，而打算做今年最後上市新股嘅「名軒」，就有「上海名人飯堂」同「汪道涵之子董事」做話題，尋日仲加多個「金勞詹」詹培忠入飛。
詹培忠可能真係錢多得滯，絲絲問佢係咪入咗飛認購名軒，佢諗咗一陣至醒起，問佢認購幾多，佢就話「好少啫，捧吓場」。
有賓卡就講，前排大閘蟹時節去過上海名軒總店視察，真係撞到好多達官名人宴客，飲酒食蟹好似倒水咁。名軒創辦人兼主席陳大寧成日話要將名軒做內地餐飲界嘅「LV」，聚集政府要員、企業高層同富豪喎。名軒招股書披露，上星期啱啱委任兩位重量級獨立非執董，一位係四叔愛將陽光房託（00435）管理人陽光資產管理主席謝偉銓；一位係汪致重，原來佢係已故前海協會會長汪道涵第二個仔，現任上海向陽公益基金會法人代表。
絲絲好奇名軒來頭咁勁，點解只上到創業板呢，賓卡叫絲絲睇公司盤數，發覺名軒一○年有成1.23億元（人民幣‧下同）收入，但溢利唔夠一千萬元，原來已耗存貨成本食咗收入嘅56%，響大陸開舖成本真係好高。