中投早前因為投資東京電力失利，加埋中國近期多次減持日債，大家都以為中國今後會減少喺日本嘅投資，但係情況剛好相反，尋日絲絲睇到中投夥拍新加坡房地產商普洛斯公司GLP合作投資當地，睇嚟中投除咗睇好有潛質嘅歐美企業，連日本樓市都押上一注。
其實中投一直話要加大投資國際資本市場嘅規模，為咗取得更好回報，仲會投資房地產業務，但絲絲估唔到嘅係，佢哋對日本樓市有咁大興趣，話晒日本政府早前已經開腔，擔心中國係當地太多投資會衍生政治敏感議題，所以今次中投夥拍第三者一齊合作，相信係想減低佢哋嘅政治色彩。
據外電講，中投先與新加坡普洛斯合組一間合資公司，各佔一半權益，然後向仲量聯行旗下嘅領盛投資管理（LaSalle Investment Management）收購15個日本物流倉庫，涉資1,226億日圓（折合約16億美元）。