今年A股表現曳，唔少名人嘅身家或多或少都受到影響。但原來乜都唔做，淨係揸實，一樣可以令收益率倍升。邊個咁叻？咪就係靚仔演員黃曉明嘞，佢揸住嘅華誼兄弟值成億人仔o架。
去年四月上市嘅合眾思壯，因為得到移動長城姚明揸重貨而備受關注。呢幾年姚明經過公司改制同派股，持股量已增至81萬股。不過合眾思壯嘅股價係咁跌，去年底每股仲有43.37元（人民幣‧下同），到尋日就算升停板，都只係剩番27.18元。
其實姚明帳面仲係賺，但一年嚟就賺少近千萬元。好似著名作家余秋雨，10年前獨具慧眼買咗徐家匯嘅原始股，佢揸嘅股份明年三月可以解禁，但徐家匯都係今年跌破底價嘅股份之一，所以余秋雨未實現獲利前，帳面即刻賺少近2,000萬元咁多。
至於明星消息多籮籮嘅華誼兄弟，黃曉明由入股到解禁都未賣過一股，今年經過送股後，依家增加到648萬股。
去年黃曉明嘅股份價值係5,824萬元，尋日市值已經超過1億元，升幅接近1倍呀！
余詩韻