市場熱線：中信証券博得過

金正日去世究竟對魚缸影響有幾大只係靠估，但南北韓幾次擦槍走火都係一場虛驚，除非接班人更癲，否則唔會有乜大鑊嘢，匯市反應亦相當平靜，歐股早段直情當冇嘢發生，包括7國被威脅降級亦未驚過，淨得南韓魚缸成重災區。

內地股民聯想力強

其實南韓係一個好值得投資嘅地方，淨係「三叔」一隻已夠照，打到日本電器謝皮，地緣政治係主要風險，北韓時不時發吓窮惡都幾麻煩。香港上市得隻漢登（00448）係南韓概念股，依家可能由YGM（00375）成隻吞晒，至於利豐（00494）已經否認想收購。

A股下晝回升，其中一樣升得最勁嘅係軍工股，皆因怕打仗？另外係傳媒娛樂股，唔通亦同政治緊張有關？股民嘅聯想力一向豐富，前排股神入股IBM，科技軟件股即時有鑊氣；但今次股神買太陽能股，保利協鑫（03800）同其他太陽能股仍然冇厘神氣。

恒指雖然跌得唔多，但藍籌股得電能（00006）同QQ（00700）兩隻上升，上周五無厘頭上升嘅股即時回吐，最明顯係安踏（02020）大跌一成，高追短炒有辣有唔辣，有時搭到順風車，有時踩大戶蕉皮，但今年好易輸身家。大戶增持亦未必跟得過，聯邦制藥（03933）大股東愈買愈低，億和（00838）不斷有芬佬買貨，但尋日大跌7%。

新華保險（01336）上市第3日創咗新低，收報25.1元；但A股上市兩日都升，收報26.96元人仔，即係A股貴過H股3成，喺保險股當中咁大溢價確係少見，不過A股頭兩日表現通常唔能夠作準。

RQFII遲吓實加碼

RQFII卒之出籠，喺依家金魚缸難以搵食嘅情況下，古勝都有興趣買吓人仔債券，何況人仔呢兩日升番晒。但RQFII得200億人仔限額肯定僧多粥少，至於唯一內地證券股中信証券（06030）喺上周五借消息升咗一日之後，尋日已回吐2.5%，再度要潛水。不過，近期有3間外資行都發報告唱好中信証券，里昂目標價睇19.3元最高，但「你戇」屬半個關聯人士，可信性要打折扣；而德銀同野村分別睇15.73元同15.4元冇咁離譜，距離現價都有約兩成上升空間。

RQFII初期「晒士」太細，一般都覺得對券商股幫助唔大，但亦一致認為遲吓一定加碼，券商股細水長流實有得益。另外，今年A股跌到咁殘，出年就算唔回升都再跌有限，其實有幾分值博率，近兩個交易日都喺低位有彈跳力。

中信証券年中時諗住用3.74億美金，買法國農業信貸集團旗下里昂同盛富證券近兩成股權，但仲未得監管機構批准。老實講，年中同年尾股票市場已係兩個世界，如果買唔成反而係好事。

古勝