絲絲講場：郭家耀做老襯「趕造人」
今年財金界真係喜事重重，除咗窩輪界嘅瑞銀亞洲股票衍生產品銷售部董事總經理于正人，以及法巴上市衍生產品部聯席董事趙海珠啱啱結咗婚之外，今日絲絲又八到，海通國際證券中國業務部副總裁郭家耀（Matthew）都喜事臨近，佢會喺下周一同拍咗六年拖的女朋友結婚，到時仲會宴請唔少股評人出席佢嘅婚宴添。
生仔生女無所謂
絲絲仲八到，Matthew嘅未來老婆是以前喺敦沛嘅舊同事，下個禮拜會喺金鐘港麗擺三十幾圍，請晒一班舊同事同其他行家去。而一向鍾意陽光與海灘嘅Matthew仲話打算出年年頭去馬爾代夫度蜜月。佢仲好大方咁畀咗絲絲幾張結婚相，睇到佢哋搵到人生嘅另一半咁幸福，真係戥佢哋開心。
Matthew仲話結婚之後會「努力造人」，希望好快有佢哋嘅愛情結晶啦，但生仔定生女，就話無乜所謂喎。Matthew咁開通，睇嚟佢唔只係錫老婆，仲會係好爸爸添。
余絲韻