你可能唔識得芬蘭嘅Rovio Entertainment，但係如果話你知，佢就係風靡全球嘅手機遊戲「憤怒鳥」（Angry Birds）嘅開發商，斷估你無理由唔識。
呢家公司單靠呢款遊戲，今年營業收益將達1億美元，Rovio嘅營銷總監Peter Vesterbacka同媒體豪言，要發展與媒體巨頭迪士尼市值堪媲美嘅新一代媒體企業，仲計劃一三年衝港上市，據悉市值閒閒哋高達10億美元。
講開手機遊戲商Rovio，佢原本為同鄉諾基亞寫開遊戲軟件，但未料到旗艦遊戲「憤怒鳥」要到iPhone平台才大放異彩，營銷收益仲撐起成家公司，跟住借勢打進亞洲市場，連絲絲都要寫個服字。
據Rovio管理層講，內地已經係公司當前增長最快嘅市場，早前公司更分別喺香港同上海設立業務據點。
而Rovio以「憤怒鳥」開拍嘅電影及拓展玩具等授權產品，亦瞄準中國為主的亞洲市場，難怪Rovio上市首選地要落戶香江。
余絲韻