近日出入中港兩地，經過超級市場都會睇下貨品銷情，發覺牛奶果欄競爭都幾激烈，有好多唔同嘅牛奶產品。不過，要數品牌牛奶產品，相信大家唔會數到好多隻，「蒙牛」就肯定係個著名品牌。集團近年推出兩種傳統產品，想喺香港打入健康飲品嘅市場。
蒙牛乳業（02319）主要業務喺祖國生產同銷售乳製品，同時間要面對非常激烈嘅競爭，要突圍而出並唔容易。不過，蒙牛嘅發展戰略值得參考，佢喺近幾年成功緩解喺乳製品行業遇到嘅難題，乳品一哥並唔係浪得虛名。
近年引入國際化企業設置，對組織架構進行改革，引入經濟學嘅「精細分工」，進一步加強產能。同時間，公司亦不斷推動不同部門之間嘅交流合作，以極大化資源運用效率為目標，近幾年開始見到公司發揮出整體協同效應，喺節約成本方面做得十分之好。
集團係內地著名品牌，業績高於行業平均水平。集團乳製品產品一○年度嘅銷量同銷售額都係全國第一名；同一時間，集團喺酸奶市場嘅市佔率亦係全國第一位，喺行業中一直充當住領導者角色。集團去年度盈利上升15.1%，截至六月底止嘅中期盈利更上升27.6%，現價市盈率約32倍，主要係反映佢高增長概念同龍頭嘅地位。繼續追蹤、出發！
香港大學電子金融服務榮譽助理教授 徐燦傑