內地房地產市場就繼續急凍，唔少大發展商十一月銷售仲插晒水，華遠地產董事長任志強（花名任大炮）近日喺微博大鬧住建部「乾脆滅了房地產業，重回福利分房算了」。
早兩日任大炮就喺個論壇上面同住建部政策研究中心副主任王玨林狹路相逢，王玨林即時以「吃了肉還罵娘」，回敬任大炮。呢個叫「房地產夜話」嘅論壇，大家起初都係發表自己嘅觀點，不過仲未到第二輪嘅嘉賓互動環節，任大炮同王玨林就因為唔同觀點提前開火，火藥味好重。
王玨林話房地產市場係由政府培育，而發展商嘅發展都係政府畀嘅，佢批評任大炮就係敢講，不過基本都係亂講，仲話佢「吃了肉還罵娘」，掙咗錢仲唔滿意。任大炮聽到火到嚟埋，反駁話房地產市場本來就係開發商嘅，政府梗要培育o架啦。