絲絲講場：會計師公會今選舉 2副會長爭坐正
會計師公會AGM今日舉行，理事會選舉已有初步結果。今屆理事會選舉共有14人參選，爭取7個席位。初步結果係，參與重選嘅現任理事，包括2名現任副會長趙麗娟及Keith Pogson都順利當選，而陳美寶、丁偉銓、同埋「一人一票選會長」支持小組成員龔耀輝亦成功當選。正式嘅選舉結果同得票多少將於今日AGM內公布。
AGM後續有好戲睇
一直以來，會計師公會正副會長都係由新選出嘅理事會互選產生。根據慣例，多數都係由副會長「升上」做會長，故今屆會計師公會會長估計都不出趙麗娟及Keith Pogson之爭。
不過，今屆AGM卻與以往有啲與別不同，AGM之後「有好戲在後頭」，事關有改革派提出「一人一票選會長」呢個議題，故今日AGM之後仲加插一個EGM（特別大會）。
「一人一票選會長」呢個議題，改革派認為理直氣壯，因為係最合理、最公平嘅選舉方式，不過，大型會計師行甚至會計師公會本身，就對議案有保留，覺得實際運作有好多技術問題，故最終議案通過機會唔高。無論如何，今日EGM「改革派VS大行」，都係幾引人關注嘅。
余絲韻