市場熱線：上氣買些少做貨底

恒指尋日最多插459點，收市頂番上萬八，全日跌327點報18,026點，雖然歐股開波表現幾好，但期指仍低水66點，成交588億元。港股咁樣陰陰跌法，尋日已有81隻股票創52周新低。

比起A股，港股已冇咁慘，啱啱開完中央經濟工作會議，冇提放水都成向下插藉口（同聯儲局開會後結果一樣），但奇在會議重申絕對唔會放生樓價，內房股無論A、H股都反而逆市上升，內房股成為依家最難捉路板塊，不過尋日亦有消息話阿爺暗地裏放你一條生路，錢莊出年會逐步放寬按揭，包括恢復首置房利率優惠。

樓市係「保增長」支柱

其實阿爺講明要「保增長」行先，樓市一唔掂就乜都玩完，業主見自己層樓價值下跌，仲有乜心情消費？而班無殼蝸牛為儲錢上車亦會減低消費，到時內需谷鬼谷馬咩！中央工作會議用「穩中求進」四個字做總結，邊個唔想又穩陣又進步？古勝揀股都希望「穩中求升」啦！

滙豐中國十二月PMI初值回升到49，滬綜指跌2.14%，連2,200點都穿埋。A股淪陷，最衰自然係主力投資A股嘅內險股，但只得國壽A股跌8.88%最樣衰。新華保險A股今日先登場，H股（01336）已潛水一成，周大福（01929）亦低招股價8%，但沉底王多金屬（02133）大幅反彈18%。

A股除咗內房股有表現外，電力股亦連日上升，加電費兼且煤價跌雙重利好，但油金銀銅價全部跌到一仆一碌，資源股尋日全面跳水。另一種較差嘅係汽車代理股，祖國還以顏色向美國車徵收反傾銷稅，而汽車股則算唔差，東風（00489）、華晨（01114）同長汽（02333）靠穩，但廣汽（02238）就創上市後新低。

核電項目重啟在望

電力設備股亦個別發展，火電股經營環境有改善，照計投資意欲上升，主力做火電設備嘅哈電（01133）應受惠，但尋日最多跌9.6%，收市跌幅收窄到3.2%。較具核電概念嘅上海電氣（02727）同東方電氣（01072）則分別升2%同跌1.3%，但兩隻A股卻走勢相反。講到核電，蓋茨啱啱返大陸計劃投資新型核反應堆，由此推測，出年阿爺重新批准核電項目更加冇走雞。

上氣相對其他股份係處於強勢，但同時亦處於下降軌當中，呢排個市咁肉酸，古勝亦唔會心急買貨。不過，電力設備股尤其核電概念預期出年會好轉，所以不妨低位買番些少。

古勝