打工仔明年最想乜？保住飯碗，最好加埋人工。渣打香港行政總裁洪丕正（Ben）就送上最佳聖誕禮物，話員工只要表現好，都應該會有人工加，今年仲係請緊人，出年就睇情況。
今年印象最深刻嘅事唔少，除咗估唔到歐債危機不穩定性加大，最估唔到係離岸人民幣業務發展咁快，貸款突飛猛進，離岸人民幣匯價又出現雙邊交易，唔似之前一面倒買。
歐洲依家立立亂，阿Ben話市況仍然好波動，大家要扣好安全帶，免被亂市「chok」親。不過，渣打咁多年嘅業績都係chok上，阿Ben希望渣打集團（02888）同渣打香港收入同溢利都可以連續九年創新高，而評級機構又上調母子兩行評級，屬外資行稀有，寄望明年渣打創造十年新高神話。