尋日港交所（00388）開董事會，除咗討論最令人關注嘅港股加時外，據聞亦有討論港交所員工花紅、明年加薪情況。港交所尋日就公布，董事會已批准撥出880萬元，用嚟購買港交所股份，以獎勵行政總裁李小加。
絲絲睇番之前嘅獎勵計劃，舊年董事會就撥出720萬元，用嚟買股份畀李小加，換言之，今年佢嘅獎勵有得加，大份咗！再睇番港交所個股價，880萬元，以尋日收市價125.1元計，大約係有70,343股。至於舊年，720萬元，按去年當時收市價183.2元計，只買到39,301股。咁李小加份禮真係大咗喎！絲絲仲未知李小加明年有冇人工加，同埋仲有冇其他花紅。
至於其他員工，董事會尋日亦撥出1.248億元購買股份，用嚟獎勵入選僱員（不包括李小加），其中2,000萬港元會預留給一二年新聘人員。