市場熱線：聯想擺明要做一哥

港股成交得433億元，期指亦得5.8萬張，仲有十幾日放聖誕假都係任人魚肉格局。個市衰在已好、壞消息難分，明明前日西班牙、希臘同EFSF賣債都幾好，但聯儲局份毫無新意嘅會後聲明卻成為向下插藉口。

中央經濟工作會議尋日亦開完，都係嗰兩句：「穩健貨幣政策同積極財政政策」，人行公布嘅十一月新增貸款及M2同預期都差唔多，但A股弱過藥煲，就算預期今個月會減多次RRR都冇乜刺激作用。

人仔有貶值機會

美匯指數上到80樓上，歐元跌到1.30邊緣，人仔中間價尋日略為開低，結果連續11日跌停板，1年期人仔合約溢價超過700點子，即係預期人仔會貶值逾1%。有英國對沖基金話今年「造空中國」獲利52%，中國係封閉市場，造空難度好高，唔知所謂「造空中國」係咪代表沽空H股？而獲利52%亦唔知基數有幾大。

A股十年來指數水平原地踏步惹來議論紛紛，有人歸咎係上市公司市值十年來擴大10倍分薄塊餅，但祖國同胞儲蓄率高又冇乜投資渠道，A股市值只係22萬億人仔，似乎講唔通。呢排水泥股特別弱，原因係水泥價格已連續跌咗3個禮拜，煤炭股旺季亦跌價，喺冇乜嘢好炒之下，電力A、H股成為逆市奇葩，電費有得加兼煤價下跌，基本層面明顯好轉。

金價亦大跌，但油價重上每桶100美金。周大福（01929）同新華保險（01366）今日登場，結果都係雷聲大雨點小，暗盤價齊齊跪低；尋日嘅寶信（01293）同多金屬（02133）已壯烈犧牲，分別潛水14%同39%，OTO（06880）次日亦大跌18%，剩得創業板上市嘅第一信用（08215）任佢舞。

購併擴大市佔率

依家搵食艱難，聯想（00992）難得仍然依住條上升軌前進，電腦行業照計難免受到經濟環境影響，但聯想增長主要來自中國同新興市場。依家惠普已宣布淡出個人電腦市場，聯想呢個「二哥」未來可能會再升做「一哥」，而公司亦不斷進行購併，今年已先後同NEC組成日本合營公司以及收購德國公司Medion股權，喺日本同德國呢類成熟市場亦爭取更大市佔率。

依家普天下都視蘋果公司為假想敵，所以聯想就算成績表次次好過市場預期，但股價始終唔能夠再進一步，皆因「唉pad」實在來勢洶洶，但蘋果公司PE反而遠低過聯想，皆因潮流會成過去，到時邊個係最後贏家都未知。聯想暫時只係跟風者，將個「唉」字換個「樂」字，價錢賣平好多去競爭。但聯想嘅學習能力有往績憑證，做到「二哥」並非靠符碌，所以長線會繼續做大做強，依家先買未算相識於微時，但有買貴冇買錯。

古勝