日做夜做冇停手，返到屋企要抖抖，所以Prof. J都買咗一堆按摩產品，有唔同牌子，功能各有特別。不過，上市嘅保健按摩產品公司就唔係咁多。近排新股密密上市，計之前周大福（01929）大鑼大鼓之後，依家又有好幾隻新股排緊隊。
豪特保健（OTO）（06880）係保健產品開發商同零售商，除咗自己生產保健產品，亦兼顧埋銷售一環。佢喺香港、中國同澳門都有零售專門店，銷售自家品牌「OTO」。產品組合龐大，包括消閒產品、健美產品、保健產品同診斷產品等等。根據市場調查公司弗若斯特沙利文報告，以銷售單位數量計，集團喺一○年香港嘅消閒設備市場排第一，市佔率65%，銷售成績相當唔錯；至於人體局部按摩裝置，市佔率更達72.2%。
公司嘅銷售渠道多元化，包括有傳統嘅銷售渠道（零售店、寄賣專櫃）、主動銷售渠道（展銷櫃台、公司銷售國際銷售等等）。現時公司喺香港合共有14間零售店，16個寄賣專櫃；澳門有一間零售店，兩個寄賣專櫃。值得留意嘅係，公司喺中國亦有14個寄賣專櫃，位於各個中國主要城市，例如北京、上海、深圳等等。咁睇起嚟，公司有唔錯嘅開發內需潛力。
公司擬發行8,000萬股股份，九成國際配售，一成公開發售，當中有15%超額配股權，招股價介乎1.28至1.6元，主要用作擴張內地業務，包括開店、請人等等。繼續追蹤、出發！
香港大學電子金融服務榮譽助理教授 徐燦傑