絲絲講場：Google港數據中心開工
香港跑贏台灣、新加坡！絲絲唔係講緊三地嘅競爭力，又或者係經濟增長，而係Google（谷歌）起嘅數據中心。佢哋早前公布香港、台灣及新加坡三地，自建三個數據中心，尋日個項目喺香港動土，正式「落地生根」喇，仲係三地之中首個開工嘅項目，對本港嘅IT界來講，都算係一個值得高興嘅喜訊。
Google喺三地建數據中心，改變目前單靠美國及歐洲同類設施，向亞洲區提供服務嘅情況。其他兩個點樣起法，絲絲就未八到，淨係知道位於將軍澳嘅數據中心佔地2.7公頃，計埋地價涉資約3億美金，可於一三年初投入服務。正式開張營運後，亞洲用戶Sent gmail同用Google Search速度會比目前更快，就連能源效益都會因而提高！
啟動時間快過星台
點解香港今次快過晒其他地方動工？Google全球副總裁劉允同絲絲講，除咗因為香港出於發展需要之外，亦要多謝本港各有關方面嘅積極配合，至可以咁快手快腳。
Google自建數據中心捨內地而取港、台及星，好多人都估係由於內地資訊安全法規有風險。不過，Google亞太區硬體管理總監張善政，就點都唔肯正面回應呢個說法，只強調數據中心嘅選址，是出於多方面考慮，唔應該只着眼個別因素咁話！
余絲韻