市場熱線：信義蓄勢試高位

滬綜指朝早一度失守2,307點嘅上次低位，但好友立即頂上，中午前倒升14點，收市仍要微跌。恒指尋日亦被A股帶住走，朝早一度失守萬九，其後跟A股跌幅收窄，收市跌132點報19,107點，成交縮到489億元。比較特別嘅係窩輪成交急增，幾乎拍得住牛熊證，佔大市成交超過兩成，據講係縮vol嘅關係，吸引資金由牛熊轉番玩窩輪。

要防範通脹重臨

尋日最令人意外嘅新聞係財爺喺外國放風，話如果樓價續跌可能會放寬炒樓措施，早輪先講緊徵收「空置稅」，樓市政策真係五時花六時變，雖然有彈性係好事，但無論炒家或買家都會覺得無所適從。

鬆手消息一出，孖屐即估會放寬額外印花稅，但地主股同代理股尋日較為慢熱，美聯集團（01200）、美聯工商舖（00459）、田生（00183）最後都大升收場，開市前美聯傳出裁員一成消息，結果只係平開，但到11點開始愈升愈有。

近排另一話題係人仔7連跌，但實際情況係人行日日開中間價6.33幾，跟住好快跌停板，尋日一度回升到6.35幾，不過收市仍係6.36幾，其實人仔呢幾日並冇貶值到。今日祖國會公布CPI，坊間估計會進一步回落到4.3%，然後有機會聖誕再減RRR當送禮物。不過，全球央行放水，通脹恐防出年重來，所以炒人仔貶值同減RRR未免太早。

尋日唔少細價股異動，國中（00202）無端端翻炒，被凍結煤礦資產嘅德金（01163）大跌後又大升。而中播（00471）加盟美國高級數字電視系統委員會即炒上19%，其實好多人都唔知係乜料，據介紹係日後用幾隻內地牌子手機可以喺海外收睇電視廣播節目，究竟會有幾大市場閣下可自行斟酌。

押後分拆非壞事

買科技股大部分股民都係盲摸摸，古勝自問唔係呢科，資源股講供求比較易睇，信義玻璃（00868）近日圓底回升，隻股走勢一向大上大落，睇信義圖表幾特別，每1蚊都係重要關口，九月跌到2.75元後反彈，十月同十一月都係跌到4蚊見底，今次升到近5蚊亦係一個關口，升唔穿就出現頭肩頂走勢，但近日升勢有力，如果升穿鑊頂則可再衝一段，可以搭吓順風車，但記緊要嚴守止蝕位。

講基本因素信義的確唔差，集團依家業務包括汽車玻璃、建築玻璃、浮法玻璃同太陽能玻璃，上半年太陽能玻璃增長迅速，亦成為公司未來主要增長動力，前排本來計劃好分拆太陽能玻璃業務上市，點知臨門撻Q，其實等市況好啲再上未嘗唔係好事。

信義上半年純利增長31%，由於樓市同建築市道差，所以下半年玻璃價格亦偏低，但信義股價大跌已反映負面因素，古勝今次係短跑性質，因為玻璃價格升跌都好快，中長線則要𥄫實內地經濟同樓市走勢。

古勝