絲絲講場：新地郭老太今日交棒
新鴻基地產（00016）喺九月已經預告咗人事變動，一家之主郭老太喺今屆股東大會完結後正式退休，由郭炳江及郭炳聯拍住上，今日就係新地股東會嘅大日子，絲絲都打算去同郭老太打個招呼。
新地今日舉行第三十九屆股東周年大會，亦即係八十二歲嘅郭老太告別之作，佢光榮退任後，兩位乖仔郭炳江及郭炳聯會晉升為聯席主席。
學郭炳江話齋：「同Raymond（郭炳聯）之間合作無間，（兩人）有唔同工作範疇，亦會有洽談，一日搵佢五次，合作50幾年，無嘢講唔掂，有信心合作好。」
續任兩慈善基金主席
郭老太第日唔使再咁掛心公司業務，但唔等於冇嘢做，因為佢會繼續兼任兩個慈善基金主席。
其實今年都幾多接棒例子，好似新世界發展（00017）主席鄭裕彤之子鄭家純公開承認第二代掌舵人之位外，邱德根創辦嘅遠東發展（00035）亦喺九月將家族上市旗艦交棒畀「老虎仔」邱達昌。
余詩韻