「金牌莊家」金勞詹（詹培忠）響股票市場靜咗一排，終於又再出手啦，押注嘅係佢多年老友余維強嘅創業板公司瑞豐石化（08096，前稱博軟）。老詹同絲絲講，話係間公司近排配股，睇到個價靚，又希望間公司可以「有啲嘢搞吓」，所以落疊認購咗，仲「浮埋面」，要喺聯交所嘅權益披露中「露面」。
不過老詹就話佢純粹係投資者身份，唔會入董事局喎，而絲絲最關心係佢批貨會坐幾耐呢？老詹就笑笑口話：「中線啦」，主要睇公司嘅表現啦。
瑞豐喺上周五（十二月二日）宣布先舊後新配售2.32億股，每股0.25元，較當日有近一成九折讓，淨集資5,640萬元做營運資金。聯交所資料尋日就披露，老詹當日買咗1.9億股，咁即係差唔多近八成二係由佢一手買起，認真豪氣。不過，圍起都係4,750萬蚊，對於成日過拉斯維加斯閒閒地執幾千萬嘅佢嚟講，真係濕濕碎。
瑞豐執董余維強同主席余允抗依家仲揸住公司43.62%股權，十一月披露抵押咗一億股畀南方石化抵債，股價跌咗一排。絲絲都特登問佢，係咪幫老友手？老詹就話主要係睇公司！