中石化（00386）係中港兩地嘅交投都相當活躍，唔知係咪咁連千奇百怪嘅買賣盤都喺中石化呢隻股份見到。
話說中石化A股尋日嘅買賣盤本來正正常常，但去到下午一點半之後，突然有好多28手嘅買盤湧現，最盞嘅係清一色都係用7.28蚊嘅價錢落盤，睇到班經紀同投資者眼定定，唔知發生咩事！
計番條數，半個鐘頭內總共有150幾個交易盤都係用28手成盤，場面咁壯觀，市場傳言四起，有人話係咪有操盤手太過無聊，專登整咁多28手盤嚟開玩笑，娛樂吓大家；又有人諗法比較理性，話應該係操盤手程序出咗錯云云，咁唔知邊個講法至啱喇。不過諗諗吓莫非28即係易發，純粹係攞個好意頭，所以搞咗個奇景出嚟！