絲絲講場：恒生梁太夠勇 7℃滬跑馬拉松
上周末冷風吹襲全國，但無損長跑選手嘅熱誠。絲絲講緊嘅係恒生（00011）副董事長兼行政總裁梁高美懿，喺上星期日率領150位員工參加上海國際馬拉松賽，梁太更冒住得攝氏7度嘅冷天氣，完成咗人生首次長跑賽──4.5公里長嘅健康跑。
今年係恒生第二年參加呢項賽事，絲絲記得舊年係薛太（恒生中國副董事長兼行長薛關燕萍）帶隊，今年薛太亦有再接再厲參與；當然啦，講起馬拉松又點少得長跑好手恒生助理總經理張樹槐，佢今次就出戰全程馬拉松，為跑過逾三十次馬拉松嘅戰績再添上一筆。
盛讚同事士氣高昂
呢個馬拉松賽唔單止運動咁簡單，恒生過去兩年已經籌得15萬元人民幣，捐晒畀上海市慈善基金會；梁太就話可以同同事一齊行善之餘，更可以推動工作同生活嘅平衡，她亦大讚參賽嘅恒生團隊士氣高昂，充滿活力咁話。
今年上海國際馬拉松賽有2萬6千人參與，選手來自全球68個國家或地區，參賽人數較舊年增加逾五成，其中兩成係外籍人士。
余絲韻