市場熱線：東風現價可上車

新股吸水影響交投

呢幾日係新股抽水高峰期，點都要頂埋呢幾日先算，新華保險（01336）、海通（06837）同周大福（01929）三大抽水王正面交鋒，周大福擺明係貴，但城中富豪齊捧場，兼且好快入摩指跟住入恒指成分股，唔少股民見彤叔個招牌都要冒險博一博，而影子股淨得六福（00590）有料到。

其餘兩隻唔算有乜概念，尤其A股咁弱，海通比較牙煙，但今日登場嘅時代集團（01023）因為估值低可以短炒。呢個月大嗱嗱抽水幾百億，恐怕將令個市更加乾塘，尋日港股成交略超過500億元，前三日摩指、恒指執位兼千點大升市，今個禮拜成交會回歸平淡，跟住芬佬陸續放聖誕假會令成交進一步減少。尋日交易系統升級，落盤快過眨眼，睇齊10格買賣盤，但撞啱牛皮市，穿梭機系統都冇用。

有錢都留番嚟博新股，但冠德（00934）選擇呢段時間供股，皆因阿媽中石化（00386）揸住七成幾股權，而阿媽賣碼頭套現番22億元，即係左手交右手啫。不過，冠德走勢圖係倒轉大deep V，高追者要陪跳。

尋日港股喺3點先發威，思捷（00330）亦喺呢段時間發力，隻股上周五結束7連升，但尋日支回馬槍相當應棍。思捷被踢出摩指反而仲勁，兩隻新貴旺旺（00151）同一太（00142）亦創下52周新高，旺旺直情想挾死班空軍，但康師傅（00322）則放空軍一馬，回吐1.77%。

內房股一啲都冇受限購令延長所影響，尋日多數有得升。所謂好消息出貨、壞消息入貨睇落好易，但事實最需要係勇氣，電費加咗之後電力股即散水，反而煤炭股有人追。

業務發展四平八穩

汽車股則主要睇住賣車銷量，九月大旺，十月即刻萎縮，十一月銷量就快要公布，應該唔會有太大驚喜或驚嚇，前兩年汽車銷量大爆發，所以喺買車優惠陸續結束之後，今年仍然有輕微增長已算滿意。班車廠老總大部分展望明年會比今年好，較樂觀嘅估計會有雙位數升幅。

同胞有錢買完樓買車，所以祖國嘅汽車銷量長期增長唔使懷疑；今年車市調整，所以車股亦普遍牛牛皮皮，想大上大落買華晨（01114），想輸錢買比亞迪（01211）或吉汽（00175），但只係想炒上落嘅話，東風（00489）係唔錯嘅選擇，話晒咁大間車廠，有咁多車款同牌子、PE又得單位數字，跌極會有個譜。

如果認為車市明年銷量會回升嘅話，依家係趁低買車股更係好時機，想揀隻穩陣啲嘅車股則非東風莫屬。

古勝