絲絲講場：蔣超良傳返農行揸旗
呢兩個月係內地大型銀行同金融監管機構高層，玩音樂椅嘅好季節。絲絲睇到中證監、中銀監同中保監主席人選已經坐定定，但係依家仲「吉」咗兩個位出嚟，分別就係農業銀行（01288）同建設銀行（00939）董事長職位。
王洪章入建行做執董
尋日絲絲睇兩行通告見到蛛絲馬迹，兩間銀行對下任舵手誰屬已透露端倪，因為農行正式提名國開行董事長、前交行（03328）董事長蔣超良做執行董事，建行亦提名人行黨委委員、紀委書記王洪章做執行董事，睇嚟兩人「入局」之後，坐正董事長之位指日可待。
建行同農行前董事長郭樹清同項俊波都「高陞」去中證監同中保監做大官，市場一直都傳緊蔣超良會「返娘家」，做農行董事長，皆因佢當年都算係農行出身，做到國際業務部總經理；另一方面，市傳交行董事長胡懷邦都係熱選之一，前後兩代交行舵手，邊個跑出一直令市場引頸以待。
至於人行高層接任大型內銀舵手，一直都係傳統做法，例如現任中行董事長肖鋼，上任前亦是人行副行長，郭樹清同項俊波亦唔例外。