一年一度嘅香港董事學會傑出董事獎，尋日揭曉，多名知名人士都有上榜。同其他好多選舉一樣，要有人提名至可以做候選人，唔講唔知，前會計師公會會長周光暉因此升呢做咗「星爸」。何出此言？原來佢非常「好腳頭」，佢提親邊個，邊個就當選，你話係佢好眼光，定係好彩呢？
今屆攞到傑出董事獎嘅，包括莎莎國際（00178）主席郭少明、領匯（00823）主席蘇兆明及行政總裁王國龍、招商銀行（03968）副行長張光華、安東油田（03337）董事長羅林、幻音數碼（01822）主席廖家俊等，都榜上有名，真係恭喜晒！
周光暉都算犀利，眼光獨到，今年佢連中三元，提名王國龍、蘇兆明同張光華，三人都成功攞獎，成功當選傑出董事，真係冇令周光暉「跌眼鏡」，「星爸」呢個榮譽真係實至名歸。
絲絲發現，周光暉唔係「撞手神」，佢嘅過往紀錄的確幾彪炳，佢○八年曾提名秦曉、馬蔚華；○六年提名周松崗；○五年提名港交所（00388）董事會，最後統統獲獎。封佢做「星爸」，斷估都冇乜人反對啩？
絲絲就心諗，如果叫佢提名香港小姐，會唔會都成績過人呢？如果係，考慮吓提名絲絲呀！
余絲韻