市場熱線：百盛有條件追落後

恒指收市仍升218點，報18,256點，成交升到551億元，輪證比例減到唔夠三成，乾塘市突然有起色，疑似係空軍補倉。EFSF尋晚有乜結果可以有唔同方式演繹，上兩次都有「小陽春」，但跟住歐債孳息掉頭向上，股市完成反彈再尋底。

股民年底想食尾胡

不過，十二月好多股民變身好友，期指尋日結算完之後，坊間已講緊下個月粉飾窗櫥效應，大有機會「衰家食尾胡」，年尾芬佬同公司要做靚盤數，班空軍今年賺到夠亦要放吓聖誕假，而十二月大批新股趕住搭尾班車，連光大銀行亦要趕上車，做好做醜都要頂埋佢，所以「聖誕鐘，買滙豐」支歌仔今年又再奏起。不過，出年係歐債還錢高峰期，到時又有排驚。

MSCI指數今日收市後正式執位，將被踢出局嘅思捷（00330）已連升5日，「新貴效應」依家只限於公布首日，雖然收市前最後十幾分鐘成交例必急升，但已經唔會咁易益散戶。

尋日好多發霉股翻生，例如保利協鑫（03800）、真明麗（01868）同廣船（00317）等，保利協鑫跌到兩蚊邊反彈，除咗大摩唱好之外，多晶硅跌到太殘當好消息炒，阿爺成日講行業整合，但有好多細廠頂唔順執笠，變成自動整合。

內房股繼續做好，雅居樂（03383）大摩唱完又有「高佬盛」加入大合唱，再升6.7%，惟有隻綠城（03900）仍然要跌，間公司都係被唱，但係畀祖國傳媒一路唱衰，雖然有消息話佢會孖住中投合作，但公司贊助嘅杭州足球隊就可能要搵人接手。

六福（00590）之前曾經8連跌，但估唔到成績表有驚喜，股價亦重上30蚊樓上，尋日升幅榜大把祖國零售股，包括百麗（01880）、利郎（01234）、寶姿（00589）、青蛙王子（01259）等。花旗國萬聖節有搶購潮，六福成績好兼周大福上市，帶動埋祖國零售股都有小陽春。

調整策略增吸引力

尋日炒嘅都係賣衫賣鞋股，與花旗零售商要減價搶客唔同嘅，係內地服裝零售商今年加價亦取得30%以上嘅銷售額增長，扣除加價因素，同店銷量普遍亦有雙位數增長。百貨股大部分營業額都來自賣衫賣鞋賣化妝品，其實身份係「二房東」，租金上升雖然增加成本，但另方面向租專賣櫃嘅品牌抽佣，所以今年直到第三季嘅盈利增長都唔錯。

百盛（03368）以前係龍頭，但跟住被金鷹（03308）扒頭，皆因人哋策略得宜，自置物業兼集中喺二線城市，百盛變咗低增長股，但所謂知恥近乎勇，百盛未來會較為進取，由今年第四季至出年會開13間新店，大部分會喺二線城市，尋日仲公布用7億人仔喺天津買咗大廈，估值有機會提升，今年PE約19倍，如果追番到金鷹相近PE約23倍，股價可見11蚊。

古勝