日日都要出入媒體咁滯，真係忙到冇停手，又要做節目又要寫稿，好難得又喺度同大家見面。Prof. J上次寫完電，講起煤價上升，就不約而同搵吓煤股。依家歐洲咁亂，投資番煤礦業務，至少唔使畀歐債毒死，大家話係咪？
中國秦發（00866）主要業務從事煤炭經營，包括煤炭買賣、選煤、儲存、配煤、航運同運輸等等。集團近幾年經營業績大幅改善，由二○○九年尾起，由於內地市場不斷增長，發展持續，尤其有4萬億元人民幣救市基建措施之後，發電令到對煤嘅需求大幅增加。市場需求亦於一○年持續上升，公司呢兩年抓緊呢個機遇，締造咗亮麗嘅業績。
另一方面，集團亦擴展咗客戶嘅基礎，搵到北京大唐燃料有限公司同山東日照發電有限公司呢堆新興嘅大型國有電廠一齊合作，為自己業績錦上添花。由於同大型電廠有緊密關係，集團嘅煤炭經營同貿易量，比起○九年時已有顯著增長。
睇番數據，公司一○年盈利上升191%，獲利3.77億元人民幣，而截至今年六月底止的半年業績，盈利已達3.33億元人民幣，較去年同期增長61%。現價市盈率8倍左右，唔算貴，一於繼續追蹤、出發！
香港大學電子金融服務榮譽助理教授徐燦傑