絲絲講場：新股推介OTO搵法拉撐場
新股市場忽然好旺，點至可以吸引投資者嘅眼球？以售賣按摩椅為主嘅豪特保健（即係OTO），就拉埋靚女代言人陳法拉嚟撐場，提高公司嘅曝光率。用藝人做產品代言人易啲入屋，絲絲睇番OTO招股文件，由○四年開始公司每年都為主要產品委聘一名代言人，重要係嗰期當紅嘅添。
媒體宣傳支出勁升
OTO主要揀形象健康而且平易近人嘅藝人做代言，公司今年就搵咗米雪同法拉，分別為兩件產品代言。至於呢方面嘅開支，唔知係咪因為涉及藝人明星身價等敏感數字，所以公司招股文件無詳細披露。只係話截至今年八月底止嘅五個月其他開支比去年增加37.9%，去到4,390萬元，其中因為插圖、製作同媒體宣傳活動，而令廣告及促銷開支增加咗130萬元。今年喺媒體宣傳支出增加咗咁多，唔知係通脹高企定因為代言人受歡迎程度有番咁上下呢？
喺香港嘅按摩保健產品主要由OTO同OSIM稱霸，佢哋喺唔同產品嘅市佔率可以差好遠，以按摩椅市場計，無論係以銷售額定係售出件數計，OTO去年都只係排第二，兩個項目嘅市佔率都分別只有11%同17.6%，OSIM佔74%及67.7%，但喺人體局部按摩設備市場，OTO就遙遙領先。
余絲韻