絲絲講場：恒生財管比賽發威
恒生銀行（00011）派咗五位零售銀行同管理業務嘅同事，參加咗一個由香港銀行學會舉辦嘅「2011年傑出財富管理師大獎」，掃走八個獎，成為贏得最多主要獎項嘅銀行。咁叻有乜獎？恒生零售銀行及財富管理業務主管陳力生，將會喺總行博愛堂設宴，以佳餚鼓勵得獎同事，一於食餐好嘅。
逾200從業員參賽
今屆比賽，一共超過二百個銀行從業員參賽，主要分三個比賽組別：「從事個人財富管理——高端客戶」、「具三年從事個人財富管理工作經驗以下」同「具三年從事個人財富管理工作經驗以上」，由銀行、財務機構、大學院校、香港同澳門金融機構管理局組成嘅評審團評審。
今次比賽係為咗提高公眾對財管嘅認識、提升銀行業嘅財管質素， 同表揚業界精英。得獎同事除咗可以喺食品拍得住六星級酒店嘅博愛堂，食餐好之外，恒生私人銀行及信託服務主管陸庭龍，同分行網絡及抵押貸款業務主管譚麗琼仲親身恭喜呢班同事添。
余絲韻