絲絲講場：張化橋直言：散戶注定輸
俗語有云，多勞多得。之不過，呢個說法並不適用於股票買賣。呢個結論唔係絲絲做嘅，而係有民企之父稱號嘅瑞銀前分析員張化橋所講架。佢話啲股民每日忙忙碌碌，買賣頻繁，實際上只係幫咗券商嘅忙，扣除交易費用，股民投資必然會跑輸大市。
實際回報率僅4%
絲絲聽到張化橋呢番肺腑之言，猶如當頭棒喝，唔知股民聽咗之後會有咩感想呢？張化橋嘅講法係有根據嘅，佢引述著名基金Vangard始創人John Boyle嘅研究，交易費用包括調研、佣金同稅收，千祈唔好睇小呢類費用，大市回報扣除貨幣因素後其實只得4%，佢話股民作為一個群體一定輸硬。
96%基金跑輸大市
Boyle並且引經據典，話喺多如牛毛嘅基金中，只有大約4%基金喺過去20年扣除稅收同費用之後，能夠跑贏大市，而且平均比大市只係多咗0.6%回報，其餘96%基金跑輸大市，平均每年跑輸4.8%。
換言之，股民求基金贏錢不如求自己，但求己之餘，切記唔好盲目，一日走幾轉，到時最賺錢嘅都係券商。
余絲韻