市場熱線：昆能現價風險低

意大利報紙放完流料之後，德國報紙又話6個AAA歐元國家考慮聯合發行「精選債券」，咁無厘頭嘅建議立即被否認。由歐洲報紙發流料，然後魚缸借機炒起或插落已經唔係第一次，可見造市其實幾容易。就算謠言毫無根據亦好少理。大剌剌6,000億歐元，點可以話借就借？收唔番邊個孭？使唔使夾錢？救得意粉國，到葡萄牙、西班牙、愛爾蘭又邊個救？但諗深一層，全球魚缸已跌咗咁多，搵個藉口反彈吓亦唔出奇。

好友乘機抖一抖氣

不過，事件發生喺期指結算前夕，唔通個天都要幫一幫好友同萬千待宰牛證街貨？標普期指喺亞洲時段升超過20點，亞股普遍升1至2%，歐股早段升2至3%。港股全日都幾硬淨，雖然有兩度回軟到萬八點樓下，但大部分時間只係幾十點之間上落。另一利好因素係花旗國感恩節好景，尋日利豐（00494）升超過一成。三大內房股都升6%以上，但未聽聞祖國會有鬆手，內房A股尋日亦普遍下跌。

呢兩年新股大部分都潛水，近期夾硬上嘅新股由於貨源提早歸邊，表現反而有板有眼，尋日輪到金寶寶（01239）大升13.5%。

祖國又有新政，電視劇播放期間唔准插廣告，觀眾睇劇可一氣呵成，不過，冇廣告邊有錢拍劇？前排祖國又搞咗個「限娛令」，唔通想逼觀眾轉睇中央電視台？所以呢排中視金橋（00623）走勢唔錯，但勤+緣（02366）則迭創新低。

10元水平支持力強

聯想（00992）跌到5蚊附近即刻有反彈，古勝近日建議25蚊附近買華創（00291）、3蚊樓下買創維（00751），勝在跌得多之後風險降低，另一隻值得候低吸納嘅股係昆侖能源（00135），幾次跌到10蚊附近都有反彈，公司舊年尾向阿媽中石油（00857）發股收購北京燃氣股權，發股價係10.02元，所以呢個價位頂得兩嘴。

話得說回頭，收購北燃單嘢接近一年好似仍未被阿爺審批通過，搞到昆能今年仍係大半隻石油股，當然，石油股亦唔係差，近期油價仍接近百蚊美金，但燃氣更加獲市場受落。古勝已多次講過燃氣股嘅優點，包括收益穩定、憧憬加價（近期消息係民用天然氣實施階梯收費），另外今年冬天是否「千年兩凍」同埋中俄天然氣談判進展亦係賣點。

完成收購北燃係昆侖轉型嘅重大一步，而中石油仲有好多燃氣資產，昆能亦積極發展本身燃氣業務，包括18座LNG加工廠喺出年投產，雖然轉型略嫌緩慢，勝在現價風險偏低，依家要搵穩陣股票夫復何求！

古勝