孖妹缸湖遊：高踭鞋經濟理論可信？

王：國泰君安國際投資咨詢部分析員王昕媛

黃：金利豐證券研究部副經理黃智慧

金利豐證券研究部副經理黃智慧	國泰君安國際投資咨詢部分析員王昕媛	放大圖片

經濟低迷寧睇股票

高妹： 我見你哋都成日着高踭鞋呢，你哋覺得高踭鞋高度同經濟有無關係呀？

　王： 我覺得係女仔都鍾意扮靚o架啦，呢兩樣嘢嘅關係應該唔大喇，但或會有間接的影響，因為經濟差嘅時候，市民嘅壓力會較大，唔少女仔更會以買嘢Shopping嚟紓緩壓力，高踭鞋會係目標之一。不過，我嘅消費會較為理性，有需要先會去置裝。哈哈，經濟差嘅時候，我會睇股票多過睇高踭鞋，呢啲時候通常都係趁低吸納嘅好時機嘛！

　黃： 我反而覺得係掉返轉喎。經濟好嗰時，市民先有心情使錢o架嘛，其時會有很多飯局宴會需要出席，高踭鞋就當然愈高愈好，所謂「人靠衣裝」，唔能夠馬虎。相反，經濟差嘅時候，社交應酬活動比較少，高踭鞋嘅需求自然會減少啦。不過，話雖如此，但商舖企業會推出唔同折扣優惠去刺激消費，女仔又點會抵擋得住折扣嘅誘惑呢。所以，我認為經濟好壞同高踭鞋高度嘅關係不大喇。

祺祺： 不過，我睇開時裝雜誌，發覺出年個Trend會流行啲好高嘅高踭鞋，出年經濟又咁啱備受睇淡喎！

　王： 哈哈！又會咁巧合嘅！我自己就好少着太高嘅高踭鞋，大約2.5至3吋高，唔係嘅話會好難行路o架。不過，明年嘅環球經濟增長係有壓力呀，投資者應把焦點由國外轉至國內。歐美債務問題或者要十年先有望解決，日本經濟又未見復甦喎，綜觀世界各地，只得中國能夠成為經濟增長嘅火車頭。

環球股市反覆難測

　黃：係呀，目前市況波動，主要受到歐債危機和美國經濟放緩拖累，而呢啲問題唔係一朝一夕可以解決。市場上不斷有壞消息傳出，但我認為歐元區解體嘅機會十分微。無疑歐洲處理債務危機進展緩慢，而希臘和葡萄牙亦有破產危機喎，不過近來有新方案出台，債務危機國也有新政府上台，起碼係朝着正確嘅方向。至於美國嘅債務狀況比歐洲仲差，但因為美元和美債係避險天堂，政治問題又無歐洲咁棘手。長遠嚟講，我估計環球股市會繼續反覆。

高妹：唉！環球經濟轉差，心情亦隨即跟住下沉添。但我本身已經好高，唔想再着高踭鞋嚟逃離現實喎，我想腳踏實地去投資賺錢！

　王：環球經濟前景步步維艱，你哋可以將焦點轉至國內。中國內需仍然強勁，可刺激市場消費，帶動收入上升。另外，市場憧憬中國放寬緊縮政策，可望未來十二個月內有機會下調存備金及息口，都會利好市場。我認為現時環球經濟陰霾未散，只有中國、印度、巴西等新興市場先至可以成為企業未來發展希望。

樓市反映消費市道

祺祺： 咁香港嘅消費市場會唔會受到衝擊呀？

　王：如果要知道香港市民嘅消費意欲，最佳嘅辦法唔係睇佢哋有冇意欲去行街買衫，而係買樓呀，所以主要屋苑嘅成交量係最佳指標。市民現在普遍持觀望態度，投資氣氛未見濃厚。然而，國內嘅消費需求仍然旺盛，我們可以發現大型商場外，總會排着以內地人為主嘅人龍，支撐着香港嘅消費市場呢。

高妹： 哦，好彩個消費市場仲有支持，咁啲消費股會唔會繼續受惠呀？

　王： 揀消費股梗要留意龍頭百麗（01880），基本因素吸引，第三季鞋類業務同店銷售增長18.5%，優於10%的管理層目標，反映集團仍保持良好嘅銷售增長動力。九興（01836）都係增持之選，公司製造嘅鞋履產品質素較高，上半年度更進一步擴充零售店網絡，成為盈利增長的動力。而達芙妮（00210）主攻低端市場，內地實施最低工資後，國民收入上升，對其盈利增長有利好作用。雖然依家消費股嘅估值較高，但抗跌能力較強，係長揸之選呀。

　黃： 其實投資者要揀消費股時，除咗要睇純利同毛利率等，更要注意銷售成本，尤以香港消費股為甚，因為租金往往係拖累營運嘅死穴，再加上成本，會大大影響盈利能力呢。投資者可以留意大眾品牌達芙妮，主攻內地的中低檔市場，就算經濟轉弱，行業的前景仍會相對穩定。

你認為恒指可否在最後一個月發力，重上20,000點關作年結？

港股走勢繼續受外圍消息主導，利淡有歐美債務危機未解，利好是內地宏調有機會微調，令恒指好淡爭持。你認為恒指可否在最後一個月發力，重上20,000點關作年結？據今期《東方產經》網上民調，截至上周末晚上六時的結果顯示，45%表示「可以」，55%表示「不可以」。

若有料報畀高妹同祺祺或有嘢問，可電郵money.biz@opg.com.hk

高妹、祺祺