講到用貸款做「套息」投資，套息嘅定義大家想必清楚，就係借入低息嘅款項，再買入高息嘅金融工具。套息即係大家借咗低息貸款嚟買一堆較高息嘅金融產品，從中賺取息差。最重要嘅係，大家個計劃入面要考慮貸款嘅到期日，同埋堆金融產品嘅到期日。
一般嚟講，大家借咗錢之後，假如第一階段欠款到期，係可以再借過嘅，只要大家提供足夠嘅入息證明就可以。至於金融工具方面，大家一樣可以買完一隻又換一隻。不過以基金部署嘅套息活動而言，由於年結關係，好多時考慮嘅產品都會係以「一年期套息」為主；倘若貸款同投資嘅到期日互相唔配合，基金經理通常係對套息產品嘅價格波動有某個睇法，先會諗住除咗套取定息之外，再食埋價差。
套息產品方面，由於所得嘅金錢係由貸款而嚟，一般高風險衍生工具組合，例如窩輪牛熊證，實在不宜沾手。原因好簡單，投機嘅錢一定要係閒錢，絕對唔可以用借返嚟嘅金錢。加上衍生工具本身並冇息口畀大家，反而會向大家收繳一定嘅「溢價」。無論係牛熊證、窩輪，由於槓桿關係，發行商都會向大家收取一定利息，去平衡自己嘅風險。咁樣就唔係套息，而係畀人「套」了。
另一方面，大家或者可以考慮高息股，市面上亦有好多股票每年股息達10厘或以上。事實上，向銀行借取貸款後，好多時可以一借再借；只要大家貸款紀錄良好，銀行好樂意提供「循環萬應錢」畀大家。原理好簡單——有生意唔通唔做？所以如果一隻高息股，派息穩定，每年向大家發放一定利息，大家自己將貸款利率減股利之後仍有錢落袋，就係一個成功嘅套息活動。高息股唔代表唔會跌，不過學術研究早有指出，高息股由於有利息支撐，抗跌力係強過一般股票嘅！大家都知道，高息股仍然係股票，風險含量較債券高，呢點大家亦要留意。
至於一般債券基金，回報嚟講，計埋手續費後，減除貸款利息已所餘無幾。所以當大家要投資債券基金時，應該搵較進取嘅債券基金。同時間，現時亦有好多債券基金加入唔同嘅組合理論，令投資回報更勝一籌。例如鄧普頓嘅環球債券基金，呢幾年嘅年平均回報有12.45%，相信能跑贏低息貸款嘅利息成本。
債券基金好考基金經理功夫，基金經理需衡量每一種債券嘅年期及回報率，以及對利息嘅敏感度；另佢哋要睇番該種債券類別嘅利息回報以及折扣同埋溢價對成個基金組合成本嘅影響等等。Prof J祝大家套息成功！
香港大學電子金融服務榮譽助理教授 徐燦傑