市場熱線：外圍嚴峻步步為營

渣打（02888）帶頭加按息，仲要睇兩大龍頭錢莊今日跟唔跟，再加息肯定對樓市係雪上加霜，事實上好多人對出年樓市愈睇愈淡。至於祖國樓市話上個月統計70個大中城市中，樓價呈下跌趨勢嘅城市幾乎倍增，雖然呢類統計參考價值麻麻，但內地樓價下跌已係趨勢，內房股亦係積弱，起碼等內房股年尾交完數至考慮。

到年尾又有一批新股趕搭尾班車，今年若上唔到，出年要整過盤數使多一筆，而且市況可能更差。而呢批新股不乏大粒佬，包括周大福、海通證券同新華人壽，但孖屐已經水乾，邊度搵幾百億出嚟？同類股又唔爭氣，認新股不如買舊股。

歐債火頭愈燒愈大

港股4連跌，但每日都唔係跌好多，有啲陰乾嘅味道，淡友一啲都唔心急，其實今次大鑊程度已經超過九月尾、十月初之時，因為係意粉國同鬥牛國一齊爆，仲預示埋出年會燒到去法蘭西，得歐洲央行頻頻出手買債頂住檔，但咁樣買法好快乾塘。

老實講，古勝若買債券，寧願要意粉國都唔要鬥牛國，一個失業率兩成幾嘅國家，國民晚晚玩通頂，有乜錢途可言？意粉國仲有大把資產可賣，鬥牛國有乜可賣？賣咗隊「巴菜」乎？意粉國最醒目係一早向我哋嘅祖國求救，但中國呢排被老美圍堵，暫時幫唔到手。

老美亦自己打自己，後日民主同共和黨傾滅赤方案，對魚缸會有好大影響，大家好似已打定輸數，另有消息話共和黨部分議員對加稅已態度軟化，唔少有錢佬更自動獻身同國會講要求交多啲稅，唔知係咪同近期「佔領華爾街」事件有關。

恒指上周五跌326點，收報18,491點，50日線再冇失而復得呢支歌仔唱，國指則跌穿萬點關口，跟住嘅支持位係逐千點計，萬八、萬七、萬六等，跌到咁上下又會有大反彈，但摸底的確難度好高，成交亦一路縮，上周五得531億元，沽空卒之重上一成以上。

電訊類股逆流而上

大笨象（00005）同國壽（02628）分別跌穿60蚊同20蚊關口，但國壽尾市仍有力拗番上。好似九月跌市一樣，恒指靠祖國移動（00941）同聯通兩隻電訊股頂住，而電訊股、電訊設備股同手機股呢排的確最醒神，3G概念未完又有4G。古勝甚少逛商場，但發覺最旺場嘅並非金舖，而係數碼通（00315），近日香港電訊（06823）招股反而累街坊，但數碼通若果有機會跌到12蚊不妨買番少少。

東方表行（00398）派成績表後慘跌接近一成，雖然話賺少咗係因為發option所致，但孖屐明顯係唔收貨，古勝上個禮拜亦講過部分零售商喺「十‧一」長假後出現銷售放緩，龍頭企業好似六福（00590）受影響較細，但東表則較明顯。賣衫股有威高國際（01173）連炒兩日，預早為派成績表開定香檳，但賣金賣錶都放緩，賣衫唔好咁樂觀，龍頭I.T（00999）已有辦睇，包浩斯（00483）亦都發咗盈警。

古勝