今年股市玩死唔少股神，好似「賺錢之神」普爾遜、「歐洲股神」波頓等投資高手都陰溝裏翻船，可能係基金表現平平啦，「美國股神」比爾米勒（圖）一樣閉翳，投資連番失利，致命傷係佢重注金融股嘅同時，卻對能源股棄之如履，未料到通脹到來，能源股跑贏金融股九條街。
比爾米勒揚名於九十年代，係價值投資信念嘅追隨者，佢管理嘅Value Trust連續15年跑贏標指，至○五年呢個紀綠至告終。不過，近年呢個基金因為揸重美股同金融股，過去5年有4年跑輸大市，尤其係○七年標指跌37%，佢基金表現就跌55%，引發基金大量贖回，規模由○七年高峰嘅210億美元，急降至28億美元，舊年佢嘅基金更跑輸98%同行，可能因為咁，美國股神近年已經將焦點轉移至亞洲，佢甚至多次嚟港親身推介基金。趁今次旗艦基金Value Trust三十周年宣布明年引退，將美盛基金Legg Mason嘅揸旗位讓畀佢副手、嚟自大基金富達嘅揀股人（stock picker）——Sam Peters，自己就做番美盛嘅主席。