旺市搶人、淡市炒人，係金融界常見例子。今年第一、二季個市都幾ＯＫ，保薦投行大肆請人搞ＩＰＯ，有啲外資大行細分到用唔同板塊分組，每組可能有成十人，每個月人工支出都好鬼貴，歐債危機拖冧新股市場，ＩＰＯ市場靜到死，但又冇乜聽聞投行炒人消息！
iBank老友同絲絲講，其實大家都係死頂，利用傾緊上市嘅客仔嚟做「擋箭牌」。據聞有大行嘅「組頭」，將組員安排負責唔同公司嘅上市事宜，大老細想郁人，就推話每個組員都跟緊唔同嘅ＩＰＯ，等市況好轉就推，咁老細惟有忍手。
老友又話，投行都係用緊上半年賺落嘅錢出糧，如果出年年初市況繼續壞，好多投行喺埋三月結年度條數前，就一定要手起刀落喇。依家投行最引頸以待嘅，係美國ＱＥ３嘅新水到，咁十一月底至十二月個市就有機會反彈，屆時飢渴嘅新股將一湧而出，都咪話唔壯觀。