絲絲講場：夏佳理帶隊過大海「度橋」
雖然港交所（00388）主席夏佳理明年四月就要離任，但仍然為港交所勞心勞力。除咗身體力行，今個月會去西班牙、奧地利「路演」外，明年一月，佢將會率領一眾港交所高級管理層同董事等，到澳門去開「集思會」，為港交所未來路向籌謀。
近呢一、兩年，港交所都鍾意跳出辦公室，到工作地點以外嘅地方「腦震盪」，希望「度橋」都醒神啲！記得港交所高層之前就曾去過馬會「集思廣益」。今次衝出香港，移師澳門，唔知有冇新火花同驚喜呢？
換個角度擬定策略
大家都知，港交所二○一○年至二○一二年戰略計劃都過咗一半有多，港交所未來挑戰有如「一匹布」 咁長咁多，好似面對黑池、另類交易平台、高頻交易、全球交易所整合等等嘅威脅，為咗要更好同更長遠嘅規劃，都係時候要好好探討未來策略方向。
去外地「腦震盪」都唔係港交所至有，好似上交所、深交所、中證監同香港證監會，都會定期按監管合作備忘召開會議，佢哋開會嘅地點有時亦都好特別，就曾去過四川名勝九寨溝、香港迪士尼樂園、黃山同內蒙等，真係好有特色架！
余絲韻