絲絲絕稱不上是富裕之人，對「非常有錢」會衍生乜嘢問題，淨係喺電視劇同爭產新聞中至見到。就住呢個問題，巴克萊最新財富與傳承嘅調查就印證咗一個事實，佢哋訪問咗全球2,000多個高淨值人士，結果發現香港過半數受訪有錢人，曾因家庭財富經歷家庭糾紛，高過全球四成嘅比率，但就未有印度高達六成嘅情況咁嚴重，尤其係愈有錢愈多爭拗。難怪香港耐唔耐都爆出一兩單世紀爭產案喇！
巴克萊個調查同時仲話，七成香港高淨值人士認為喺制訂繼承計劃時，必須尋求相當水平嘅專業意見，呢個水平位列全球受訪者第五，但係佢哋當中超過半數都冇訂立遺囑。而基於「父傳子」嘅傳統思想，大部分全球富裕人士依然承諾將資產留給下一代，更加希望將創造快樂人生嘅藍圖傳畀下一代，仲話會平均分配畀仔女，不過要睇能力同意願，並唔係重男輕女為先。
至於目前全球經濟仍未明朗，絲絲作為一個打工仔都真係幾擔心㗎。全球富裕人士都認為，經濟動盪同埋就業問題係下一代面對嘅最大挑戰，其中以七成香港受訪者最憂慮未來經濟走勢，較全球錄得56%為高。
余詩韻