絲絲講場：新地郭炳聯帶隊 清潔海灘
絲絲做細路哥嗰陣，做好多清潔香港嘅義工服務，海灘係其中一項，最近新鴻基地產（00016）都搞咗個「新地『以心建家』淨灘行動」，新地副主席兼董事總經理郭炳聯負責主持啟動儀式。
新地今次淨灘行動喺屯門龍鼓灘舉行，約200名參加者響應，當中包括來自多個唔同部門嘅員工及其家屬、新地義工隊以及由兒童與青少年組成嘅義工隊「陽光小組」。
啟動儀式由郭炳聯敲打銅鑼，宣布活動正式展開；然後由環境保護署副署長林啟忠、新地義工代表，以及綠色力量行政總幹事文志森，分別向參加者講解各類垃圾對海洋生態嘅影響，並示範將垃圾分類，並棄置於適當嘅收集箱。其後參加者分成多個小組進行清潔活動，群策群力，短短一小時就收集咗合共1,200公斤垃圾、200公斤塑膠以及十公斤金屬。
搭船睇中華白海豚
為咗畀參加者明白保護海洋生態嘅重要性，活動同時安排參加者乘船觀賞中華白海豚，了解佢哋嘅生活環境以及亂拋垃圾對海洋生物嘅禍害。喺日後嘅清潔活動，集團更將邀請本地小學嘅師生參與，讓學童透過親身同多媒體教學素材接觸大自然，從小培養保護環境嘅意識。
余詩韻